Presidenti i Juventusit, Andrea Anjeli, për herë të parë ka dalë kaq hapur publikisht pas “Kalçiopolit”, në krah të ish-drejtorit sportive të bardhezinjve, Luçiano Moxhi. Sipas Anjelit, Moxhi në punën e vet ka qenë më i zoti nga të gjithë.

“Në atë periudhë, Moxhi ka qenë më i zoti nga të gjithë në punën e vet”, ka thënë Anjeli në një intervistë, ndërsa ka shprehur vlerësime të mëdha edhe për të akuzuarin tjetër për “Kalçiopolin”, Xhiraudon, që bashkë me Betegën përbënin treshen e famshme të Juventusit: “Për mua ishte një pikë referimi, ishte si një baba”.

Ndërkaq, i pyetur me shaka se çfarë do t’i hiqte Interit, Anjeli ka thënë asgjë, pasi sipas tij, titulli i 2006-s, ka qenë i Juventusit dhe për të tashmë mbetet për të folur drejtësia.

Në fund, ai ka dhënë edhe një mendim mbi futbollistin që ka preferuar më shumë tek Juventusi: “Monteron, ndërsa figurat ideale ishin Toriçeli dhe Nedved”.